Pílukast: Ólöf Heiða og Viðar náðu lengst Þórsara á RIG

Níu keppendur frá píludeild Þórs tóku í gær þátt í pílumóti Reykjavíkurleikanna þar sem keppt var í einmenningi í 501. Ólöf Heiða Óskarsdóttir fór í undanúrslit í kvennaflokki og Viðar Valdimarsson í 16 manna úrslit í karlaflokki.

Okkar konur mættust í undanúrslitum

Þrjár tóku þátt frá píludeild Þórs í keppni í kvennaflokki í gær, Kolbrún Gígja Einarsdóttir, Ólöf Heiða Óskarsdóttir og Sunna Valdimarsdóttir. Ólöf Heiða komst í undanúrslit.

• Lokastöður í riðlum
• Útsláttarkeppnin

   

Fimmtán voru skráðar til leiks í kvennaflokki og byrjað á riðlakeppni en þaðan fóru allar áfram í útsláttarkeppni. Sunna Valdimarsdóttir féll út í fyrstu umferð eftir 0-4 tap fyrir Brynju Herborgu, en þær Kolbrún Gígja og Ólöf Heiða mættust í átta manna úrslitum. Áður hafði Kolbrún Gígja sigrað Maríu Emmu Canete, 4-3, í fyrstu umferðinni og Ólöf Heiða vann Lindu Dögg Agnarsdóttur 4-0. Ólöf Heiða hafði betur gegn Kolbrúnu Gígju í átta manna úrslitum, 4-1, en tapaði 3-4 fyrir Árdísi Sif Guðjónsdóttur í undanúrslitunum.

Viðar fór í 16 manna úrslit

Í karlaflokki var keppendum skipt í 16 riðla, alls 71 keppanda. Af þeim fóru 64 keppendur áfram í útsláttarkeppni, þeirra á meðal allir karlarnir frá Þór, en það voru þeir Edgars Kede Kedza, Garðar Gísli Þórisson, Óskar Jónasson, Sigurður Brynjar Þórisson, Valþór Atli Birgisson og Viðar Valdimarsson. Þeir komust allir áfram úr riðlakeppninni, þrír féllu út í 64ra manna úrslitum, tveir í 32ja manna og einn komst í 16 manna úrslit.

• Lokastöður í riðlunum
• Útsláttarkeppnin

• Viðar Valdimarsson komst í 16 manna úrslit, en beið lægri hlut fyrir Hallgrími Egilssyni, 1-4.
  Áður hafði Viðar sigrað Kristján S. Þorsteinsson 4-3 í 32ja manna úrslitum og Magnús Gunnlaugsson í 64ra manna úrslitum, einnig 4-3.
• Óskar Jónasson féll út í 32ja manna úrslitum eftir 1-4 tap fyrir Þorgeiri Guðmundssyni.
  Áður hafði Óskar sigrað Þórarin Arnarson, 4-1, í 64ra manna úrslitum..
• Sigurður Brynjar Þórisson féll út í 32ja manna úrslitum eftir 3-4 tap fyrir Kristjáni Sigurðssyni.
  Sigurður Brynjar hafði áður unnið Sigurjón Hauksson, 4-0, í 64ra manna úrslitum.
• Valþór Atli Birgisson féll út í 64ra manna úrslitum eftir 1-4 tap fyrir Eiríki Má Reynissyni.
• Edgars Kede Kedza féll út í 64ra manna úrslitum eftir 1-4 tap fyrir Hallgrími Hannessyni.
• Garðar Þórisson féll út í 64ra manna úrslitum eftir 2-4 tap fyrir Szymon Nabakowski.