Tryggvi Snær þriðji í vali á íþróttamanni ársins

Eygló Fanndal Sturludóttir, lyftingakona úr Lyftingafélagi Reykjavíkur, er íþróttamaður ársins 2025. Gísli Þorgeir Kristjánsson, handboltamaður í Magdeburg, varð annar og Þórsarinn Tryggvi Snær Hlinason, varð í þriðja sæti í kjörinu að þessu sinni. Tryggvi, sem var nú í þriðja skipti á meðal 10 efstu í kjörinu, hafði áður lent í 9. og 10. sæti.

Þetta var í 70. skipti sem Samtök íþróttafréttamanna kjósa íþróttamann ársins en valið var kunngjört í Hörpu í Reykjavík við hátíðlega athöfn.

Tryggvi átti afar gott ár með liði sínu, Bilbao sem varð Evrópumeistari.

Tryggvi tók við hlutverki fyrirliða hjá spænska úrvalsdeildarliðinu Bilbao fyrr í vetur og hefur svo sannarlega fest sig í sessi í Baskalandi en Tryggvi hefur einnig leikið með Valencia, Zaragoza og Obradoiro á Spáni eftir að hann yfirgaf Þorpið sumarið 2017.

Tryggvi var útnefndur Íþróttamaður Þórs þrjú ár í röð (2015, 2016, 2017) áður en hann hélt til Spánar.