María valin nýliði ársins hjá Linköping

Mynd af vef Linköping.

Þórsarinn María Catharina Ólafsdóttir Gros var útnefnd upprennandi stjarna knattspyrnufélagsins Linköping fyrir leik liðsins gegn Íslendingaliði Kristianstad í sænsku úrvalsdeildinni í gærkvöldi.

María, sem var leyst út með blómvendi og ávísun upp á 10.000 sænskar krónur, fagnaði heiðursnafnbótinni með því að skora eitt mark og leggja upp annað í 2-2 jafntefli.

Hún hefur átt flott tímabil þótt Linköping hafi verið að berjast í neðri hluta deildarinnar. Markið í gær var hennar sjöunda deildarmark á tímabilinu og er hún markahæsti leikmaður Linköping. Ein umferð er eftir af deildarkeppninni og er Linköping í 13.sæti af fjórtán liðum deildarinnar.

Við bendum á ítarlega umfjöllun á vef Þór/KA sem var gerð þegar María var í fyrsta skipti valin í A-landslið Íslands á dögunum. Sjá hér.