Atli Sigurjónsson í Þór

Kominn heim í Hamar heim.
Atli ásamt Sveini Elíasi Jónssyni, formanni knattspyrnudeildar og Sigga Höskulds, þjálfara Þórs.
Mynd - Ármann Hinrik

Knattspyrnudeild Þórs og Atli Sigurjónsson hafa gert með sér samning til tveggja ára og mun Atli því snúa aftur heim í Þorpið eftir farsælan feril með KR undanfarin ár.

Atli, sem er fæddur 1991, fór upp í gegnum alla yngri flokka Þórs þar sem hann var hluti af afar sigursælum árgangi sem sankaði að sér verðlaunum upp yngri flokkana og varð meðal annars Íslandsmeistari í 5.flokki og 3.flokki.

Atli við Þórsvöll í dag

Sextán ára gamall hóf Atli að leika með meistaraflokki Þórs og lék með liðinu í B-deild 2008-2010. Hann var lykilmaður þegar Þór tryggði sér sæti í efstu deild 2010 og hlaut Atli nafnbótina Íþróttamaður Þórs það ár. Atli lék með Þór í efstu deild 2011 en var seldur til KR þegar Íslandsmótinu lauk.

Atli snýr nú til baka frá KR, þar sem hann varð tvívegis Íslandsmeistari og sömuleiðis bikarmeistari í tvígang. Atli lék einnig tvö tímabil með Breiðablik í efstu deild, 2015 og 2016 en sneri svo aftur í KR, þaðan sem hann kom í stutta lánsdvöl til Þórs sumarið 2017. Atli hefur leikið 255 leiki í efstu deild og skorað 36 mörk og er fimmti leikjahæsti leikmaður í sögu KR.

Við bjóðum Atla velkominn heim í Þorpið og hlökkum til að sjá hann í baráttunni í Bestu deildinni með okkar mönnum.