Egill og Pétur stóðu sig vel með U17 í undankeppni EM

Egill í treyju númer 3 og Pétur númer 2. Mynd: KSÍ

Þórsararnir Egill Orri Arnarsson og Pétur Orri Arnarson tóku þátt í undankeppni EM með U17 ára landsliði Íslands í fótbolta á Írlandi á dögunum. 

Fyrsti leikur íslenska liðsins var gegn sterku liði Sviss og tapaðist hann 3-0. Í öðrum leik varð svekkjandi markalaust jafntefli gegn heimamönnum í Írlandi niðurstaðan í leik þar sem Ísland var sterkari aðilinn. Strákarnir luku riðlinum svo með glæsilegum 7-1 sigri á Armenum.

Úrslitin þýða að Ísland hafnaði í 3.sæti riðilsins með 4 stig og enn óljóst hvort það dugi til að komast áfram í milliriðil en það veltur á lokastöðu í öðrum undanriðlum sem hafa ekki farið fram.

Pétur spilaði allan leikinn gegn Sviss í stöðu miðvarðar og Egill spilaði allar mínútur mótsins í vinstri bakverði að frátöldum síðustu tíu mínútunum í leiknum gegn Sviss.