Frítt á leik Þórs/KA á Króknum í dag

Frítt er á leik Tindastóls og Þórs/KA á Sauðárkróki í dag í boði VÍS.
. . .

Þór/KA fer á Krókinn og mætir liði Tindastóls í 18. umferð Bestu deildar kvenna í dag kl. 14. Frítt er á leikinn í boði VÍS.

Fyrir leiki dagsins er ljóst hvaða lið leika í efri og neðri hluta deildarinnar. Það ætti þó ekki að draga úr vilja beggja liða til að ná sér í mikilvæg stig í þessum grannaslag því öll stig skipta máli í mjög jafnri og spennandi baráttu sem fram undan er, bæði í efri og neðri hlutanum.

Að loknum 17 umferðum munar ekki nema tveimur sætum á þessum liðum, en samt sjö stigum. Þór/KA situr í 6. sæti deildarinnar með 25 stig, en Tindastóll í 8. sæti með 18 stig.

Þór/KA hefur aðeins þrisvar sinnum mætt liði Tindastóls í efstu deild Íslandsmótsins og haft sigur í öll þrjú skiptin. Fyrri leik liðanna í sumar lauk með 5-0 sigri Þórs/KA.