Handbolti: Toppslagur í Höllinni í kvöld

Þórsarar taka á móti liði Fjölnis í 7. umferð Grill 66 deildar karla í handbolta í kvöld. Leikurinn fer fram í Íþróttahöllinni og hefst kl. 18:30.

Liðin eru jöfn í 2.-3. sæti deildarinnar, bæði með níu stig, hafa unnið fjóra leiki, gert eitt jafntefli og tapað einum. Á hæla þeirra koma ÍR-ingar með átta stig, en þetta eru þau þrjú lið ásamt Herði sem munu bítast um sæti í Olísdeildinni að ári. Önnur lið í deildinni eru ungmennalið. Innbyrðis leikir þessara liða eru því mikilvægir í söfnun stiga.

Þór og Fjölnir misstigu sig bæði í síðustu umferð. Fjölnir tapaði með einu marki á heimavelli fyrir ungmennaliði Fram og Þórsarar voru kjöldregnir af ÍR í Breiðholtinu, töpuðu þar með 12 marka mun. Það má því gera ráð fyrir að bæði lið mæti af krafti í leikinn með smá óbragð í munni eftir síðasta leik.

Að venju geta gestir gætt sér á grilluðum hamborgurum frá B. Jensen.

Allir leikir í deildinni eru sýndir beint á handboltarásum Sjónvarps Símans.

• Deild: Grill 66 deild karla
• Leikur: Þór - Fjölnir
• Staður: Íþróttahöllin á Akureyri
• Dagur: Mánudagur 21. nóvember
• Tími: 18:00