Pílukast: Meistaramót 501 einmenningur - Davíð Odds og Sunna sigurvegarar

Frá vinstri: Viðar Vald (3-4.sæti), Sunna Valda (1.sæti kvk), Óskar Jónasson (3.-4.sæti), Davíð Odds (1.sæti kk), Vigfús Hjaltalín (2.sæti kk), Kolbrún Gígja (2.sæti kk), Erika Mist (3.-4.sæti kvk). Á myndina vantar Ólöfu Heiðu en hún endaði í 3.4.sæti kvk.

Meistaramótið í 501 einmenning fór fram síðastliðin laugardag en mótið er stærsta innanfélagsmótið á hverju ári hjá Píludeild Þórs og skein einbeitingin úr hverju andliti, 47 karlar og 5 konur kepptu að þessu sinni.

Í karlaflokki var spilað í 8 riðlum og fóru efstu fjórir karlar áfram í 32 manna úrslit en aðrir sátu eftir með sárt ennið.

• Útsláttinn í heild sinni má sjá hér:

Bracket Knockout - TV DartConnect

Fyrirkomulag mótsins var á þá leið að 32 manna úrslit og 16 manna úrslit voru spiluð og svo var gert hlé á mótinu og keppni hófst aftur kl 20:00 á laugardagskvöldið. Fjöldi fólks mætti til að þiggja léttar veitingar og drykki og naut þess að horfa á meðlimi deildarinnar etja kappi.

 

Að lokum voru það Davíð Örn Oddsson og Vigfús J Hjaltalín sem mættust í úrslitaleik.

 

Leið Davíðs í úrslitaleikinn:

• Í 32 manna úrslitum sigraði hann Ragnar Hólm, 4-1.

• Í 16 manna úrslitum sigraði hann Jón Örn Pálssin, 5-3

• Í 8 manna úrslitum sigraði hann Edgars KK, 5-2

• Í undanúrslit sigraði hann góðvin sinn Viðar Valdimarsson, 5-4. Það mó þá til gamans geta að Viðar var kominn í 4-1 en Davíð náði að snúa leiknum sér í vil og átti ótrúlega endurkomu með því að vinna fjóra síðustu leggi leiksins og tryggja sér því sæti í úrslitaleiknum.

 

Leið Vigfúsar í úrslitaleikinn:

• Í 32 manna úrslitum sigraði hann Jón Margeir, 4-1

• Í 16 manna úrslitum sigraði hann Einar Helga, 4-1

• Í 8 manna úrslitum sigraði hann Friðrik Gunnarsson, 5-4 í háspennuleik.

• Í undanúrslitum sigraði hann Óskar Jónasson, 5-3.

 

Úrslitaleikurinn var sveiflukenndur og ljóst að mikið var í húfi. Leikurinn fór alla leið í oddalegg og var það Davíð sem sigraði að lokum 6-5.

 

Þetta var fyrsti sigur Davíðs í einmennings meistaramóti en á síðasta ári vann hann 301 tvímenning með Valþóri Atla.

 

 

Óskum Davíð innilega til hamingju með sigurinn.

 

 

Í kvennaflokki var spilað í einum riðli og fóru efstu 4 konurnar áfram í undanúrslit. Sama var uppá teningnum hjá konunum en gert var hlé á mótinu eftir riðlakeppni og keppni hélt áfram hjá þeim um kvöldið.

 

• Hér er hægt að sjá úrslit í riðli hjá konunum:

Group Play Results Round Robin - TV DartConnect

• Útsláttinn í heild sinni má sjá hér:

Bracket Knockout - TV DartConnect

 

Í undanúrslitum voru það Sunna Valda og Erika Mist sem mættust og var það Sunna sem hafði betur, 4-1 og tryggði sér í úrslitaleikinn.

 

Í hinum undanúrslitaleiknum voru það Ólöf Heiða og Kolbrún sem mættust og var það Kolbrún sem hafði betur, 4-2.

 

Það voru því Sunna Valda og Kolbrún Gígja sem mættust í úrslitaleik um sigur í kvennaflokki. Baráttan var hörð á milli þeirra en á endanum var það Sunna Valda sem varði titilinn og vann 5-3.

Óskum Sunnu innilega til hamingju með sigurinn!

 

 

Stjórn píludeildar Þórs þakkar öllum þeim sem mættu og tóku þátt í meistaramótinu og einnig þeim sem mættu um kvöldið og horfðu á. Frábær stemning var í salnum hjá okkur allan tímann.

 

Við stefnum á að halda mót í sumar fyrir þá sem vilja og verða þau auglýst á Facebook síðu deildarinnar.

 

Áfram Píludeild Þórs!