Pílukast: Stórhuga pílufólk yfirtekur Sjallann!

Skjáskot úr myndbandi sem píludeildin birti með tilkynningu um stærsta pílumót sem haldið hefur verið á Akureyri.

Píludeild Þórs hefur verið í mikilli sókn undanfarin misseri og toppar sig með því að skipuleggja stærsta pílumót sem haldið hefur verið á Akureyri. Í boði eru 128 sæti á Akureyri Open sem haldið verður 23.-24 febrúar 2024. Til að koma mótinu fyrir dugar ekki minna en að fylla aðstöðu píludeildarinnar við Laugargötu og yfirtaka Sjallann!

Akureyri Open hefur verið haldið árlega af píludeild Þórs í fjölda ára og verður mótið 2024 það stærsta hingað til og þar með einnig fjölmennasta pílumót sem haldið hefur verið á Akureyri. Mótið verður til að mynda tvöfalt fjölmennara en á þessu ári. Keppt verður í karla- og kvennaflokki og samtals hægt að taka við 128 keppendum. Keppt er í einmenningi í 501. Verðmæti vinninga verður 700.000 krónur. 

Mótið verður haldið í samstarfi píludeildarinnar og Sjallans og spilað á báðum stöðum. Leikir í riðlakeppninni verða spilaðir á föstudagskvöld og laugardag í aðstöðu píludeildarinnar við Laugargötu og í Sjallanum, en hápunktur mótsins verður í Sjallanum á laugardagskvöldinu. Markmiðið er að ná upp alvöru stemningu í Sjallanum á laugardagskvöldinu og áformað að þar fari fram átta manna úrslit, undanúrslit og úrslitaleikur í karlaflokki og undanúrslit og úrslitaleikur í kvennaflokki - á stóra sviðinu!

Skráning í mótið hefst 5. janúar 2024 kl. 18:00.