Sandra María í 200 leiki, Karen María í 100

Sandra María Jessen og Karen María Sigurgeirsdóttir hafa báðar náð leikjaáföngum með Þór/KA að undanförnu. Sandra María hefur spilað 200 KSÍ-leiki í meistaraflokki með Þór/KA og Karen María rúmlega 100 leiki. 

Við talningu er hér miðað við leiki í mótum á vegum KSÍ þar sem leikmenn þurfa að vera skráðir í lið og með leikheimild til að geta tekið þátt í viðkomandi móti. Leikir í deildabikar eru því taldir með þó oft sé litið á það mót sem undirbúningsmót fyrir Íslandsmótið - en í Lengjubikar er leikmaður ekki löglegur nema vera skráður í viðkomandi lið og með leikheimild. Hins vegar eru leikir í Kjarnafæðismótinu ekki taldir með því þar gilda ekki reglur um hlutgengi og geta leikmenn t.d. leikið með fleiri en einu liði í sama mótinu.

• Meistaraflokksleikir Karenar Maríu í KSÍ-mótum með Þór/KA eru orðnir alls 103. Inni í þeirri talningu eru leikir í efstu deild Íslandsmótsins (75), bikarkeppni (6), deildabikar (21) og Meistarakeppni KSÍ (1). Að auki eru svo fjórir leikir með Þór/KA í Meistaradeild Evrópu 2018.
• Nánar á thorka.is: Karen María komin með 100 leiki fyrir Þór/KA | Þór/KA (thorka.is)
  

• Sandra María spilaði sinn 200. meistaraflokksleik í mótum á vegum KSÍ þegar Þór/KA vann 2-1 sigur á Selfossi síðastliðinn sunnudag. Í þessari talningu eru leikir í efstu deild Íslandsmótsins (147), bikarkeppni (19), deildabikar (33) og Meistarakeppni KSÍ (1). Hún hefur skorað 117 mörk í þessum 200 leikjum. Þegar nafni hennar er flett upp á vef KSÍ kemur þar fram að leikirnir séu 199, en þar vantar leik í Meistarakeppni KSÍ 2011 þar sem Sandra María skoraði, en láðst hefur að skrá innáskiptinguna. Hún er því skráð þar með engan leik en eitt mark. 

• Nánar á thorka.is: Sandra María með 200 leiki fyrir Þór/KA | Þór/KA (thorka.is)